В лѣто 6705 [1197]. Прииде от Чернигова къ Новугороду князъ Ярополкъ Ярославиць на вербьницю, мѣсяца марта; и сѣдѣвши ему одину 6 мѣсяць, и выгнаша его из Новагорода, и послаша опять по Ярослава с Новаго торгу в Володимирь, позвани Всеволодомъ. Идоша из Новагорода прежнии мужи и сочкыи и пояша Ярослава со всею правдою и честью; и прииде на зиму по крещении за недѣлю; и сѣде на столѣ своемъ, и обуяся с людьми, и добро все бысть; и Мирошку посадника приведе, сѣдѣвша 2 лѣта за Новъгород; и вси приидоша здрави, невреженѣ ничимже; и ради быша вси от мала и до велика.